Friday, December 29, 2006

هلوسة





"بشويش نمد الايدين، ياللى انت جمبى انت فين, ألمسنى, ونسنى, أنا حيران,حيران.."


ساعات تلاقى كل حاجة اتأمرت عليك وسابتك غرقان لوحدك, صاحبى مش لاقياة, صوتى مش طالع, دموعى محبوسة, أنفاسى محشورة, حتى قلمى ضايع, معاندنى, مش راضى يقولى مالى, حبرة خلصان ماهو صوتى قرفان, نفسى انام , أعمل اية؟مش عارفة مالى!!صاحبى سابنى, كان خايف منى, طاب عملت لة اية عشان يمشى؟ ما انا بقالى كتير مسالمة ,لية بعدت عنى؟ هو أنت كنت سراب؟ أعمل إية عشان ترجع لى؟!!


صوتى واحشنى, ساكتة لكن قلبى مليان كلام..كلة فراغ,بلالين, حياتنا مسكونة فى بالونة, شكلها حلو لكن صغنونة, مش مكفيانا, فى سعى دائم للخروج منها, بس دة مكتوب..مين بس هيهرب منة, ولما البالونة تبتدى تنّفس نبدأ نخاف, يبقى هنفرقع, ومانبقاش عارفين إمتى ممكن بالونتنا تفرقع, كل واحد عايش فى بالونة لوحدة, ليها جدار منعزل عن بقية البلالين, فى بالونات نفس اللون وبالونات لايقة قوى مع بعض لكن مهما عملوا هيفضلوا بالونتين,دى لها جدار ودى جدار..ما هى دى الحياة, "هم واحد وملل مشترك" فى أودة كبيرة للأنتظار, بس المرة دى بالونة كبيرة فى انتظار الفرقعة..


وعبثى!!!

6 comments:

DoDo said...

يا نهار أبيض يا بوجس
كل دة من الامتحانات؟ على كدة لمّا تخلص هنسمع صوت فرقعة جامدة ولا بمب العيد والألعاب النارية
فعلا إحساس إنك بالونة على وشك الانفجار، أو واخدة دورها في طابور الانفجارات المتتالية لبلالين كلهل على أخرها، إحساس خنيق، بس برضه تفرق، الواحد مننا بالونة رخيصة من أبو نص جنيه، تتنفخ وتتملي هوا بس برضة تنزل ترقد ع الأرض، وللا بالونة هيليوم خفيفة، روحها طايرة في السما ولمّا تفرقع هتفرقع فووووووق في قلب السحابة القطن الحنيّينة

أنـــا حـــــــــرة said...

نورا

مش عارفه اقولك ايه
احساسك وصلنى خلاص
و دى كارثة
مش لانى حاسة احساسك جوايا
لكن لانى حسيتك وجعتينى مش علشان الكلام بيوجع لكن علشان بجد عايزة ازقك برة الدايرة دى عارفه انك هتخرجى منها بس محتاجه وقت
نفسى ااقلل الوقت بس مش عارفه ازاى

نورا نظرية البالونات دى
بجد عظيمة
بالونات لايقه مع بعض بس هتفضل بالونتين
لو لو حاولتى تدمجيهم هيفرقعوا

بس يمكن الحل يكون
عارفه بتوع البلاليين يا نورا مش بيلفوا البالونات و يعملوا اشكال
بس بتبقى العمليه معقدة ساعتها
بيبقى احساسك انهم مكلكعيين او منسجمين زياده عن اللزوم

مش عارفه
نورا عارفه نفسى فى ايه
نفسى احضنك و ابوسك بوسة كبيرة
مش علشان انتى صعبانه عليا يا حرام
بس علشان انا محتاجة احضنك زى مانتى ممكن تكونى محتاجة حضنى


عموما
الرؤية مش واضحة دلوقتى

قدام لما تخرجى من الدايرة دى و تبصى من زاوية تانيه
ممكن تشوفى الموضوع بشكل افضل



نورا بحبك طبعا
تيجى نخرج ؟

كل سنة وانتى نورا

white seagull said...

dodo..
thnx 4 ur comment, i really liked ur differentiation between the kinds of ballons..u r right..

white seagull said...

yasmina 7abebty...
bgd 7'alteeny a3ayat..im speechless
thnx 4 being my friend..
i love u too..
kol sana wenty gamby we nefdal nora&yasmine..

DoDo said...

إيه دة
هو انتو الاتنين طلعتو بلونتين، قصدي صاحبتين؟ طب والنبي خدوني معاكو في الحضن دة، قبل ما أفرقع أنا كمان
واهو كله دفا
:(
التوقيع، بالونة ضاغط عليها عيّل برجله في أول يوم عيد

أنـــا حـــــــــرة said...

بالنيابه عن نورا يا دودو بقولك تشرفى