أستجواب رسمى

بناء على رغبة ياسمينتى الحرة فى تمرير الأسئلة دى ليا فأنا أهة جاوبت على الأستجواب كلة يا باشا,بس هتلاحظوا أختلاف فى الأسلوب عشان جاوبت على الأسئلة فى يومين فى موود مختلف فالجزء الأول تخيلتة أستجواب فى الشرطة و جاوبت بشكل مهيس أما الجزء التانى جد و عادى..

صحيح يا ياسمينا الأسئلة دى بقى إيه نتيجتها هتقوليلى أنا مريضة و لا سليمة لما تقريها؟!! :)

اية اللي حيحصل لايميلك لما تموت ؟
والله يا باشا أنا هسيبة للورثة هما يتصرفوا فيه زى ما هما عايزين..

اديت الباس وورد لحد قبل كده؟
أيوة إديتة سعادتك

لو اه كانت طبيعة علاقتك بيه اية؟
والله يا باشا الجهاز بتاعى كان عطلان فأديتة لمى بنت خالى عشان تعملى حاجة, أصل يا باشا مى دى مننا و علينا, و أنا موصياها لما أموت هى تتصرف فى الميل بقى.

اسمك؟
محسوبتك نورا فؤاد.

اسم الدلع المشهور في وسط اصحابك؟
يا باشا الأسماء كتير و خير ربنا كتير و الحمد لله رضا, سعادتك أكتر إسم أنا مشهورة بيه هو نوار بس مش بتلصق فى أحمد نوار و الله يا باشا, ده أنا طلعت لقيت عمتى بتقولى نوار فأنا بحبة و أنتشر و المشكلة إنى بحب الرسم برضة فأتلصقلى تهمة إنى مستعارة الأسم من أحمد نوار(أينعم بحب شغلة) بس أنا مبحبوش..
كمان خالتى بتقولى بنورة,و برضة بحب الأسم ده قوى أو يمكن بحبة عشان بحب خالتى قوى..
أبويا بقى حضرتك بيقولى نرنر أو نرنور, و أمى مالهاش فى الدلع و الكلام الفاضى ده,
أما صحابى بقى كل حد بيقولى الأسم اللى هو شايفة مثلا(نوزا,ننور,نووش,نرانيرو...)مش فاكرة إيه تانى دلوقتى
والناس بقى اللى مش صحابى قوى و يبقوا عايزين يدلعونى ممكن يقولولى نور, أنا بحب أسم نور برضة عشان كان عندى مدرس بيقولى نور و أنا كنت بحبة قوى(الله يمسيك بالخير بقى يا مستر حمدى)
و كفاية كدة بقى,أهم حاجة بقى إن أنا بقول لنفسى نووش و نورتى,ماعرفش لية بس بنتعش بالأسمين دول..

عمرك؟
أنا شاب لكن عمرى و لا ألف عام..
حاضر حاضر.. من غير لف و دوران أنا 21 سعادتك

برجك؟
برج الجدى حضرتك أجدع الأبراج

مجالك او مجال دراستك ؟
محسوبتك تعجبك قوى فى الرسم,بحب أرسم قوى يا باشا,كمان كنت بحلم أبقى كاتبة بس واضح إن لسة بدرى قوى ع الموضوع ده لو حصل, أما تخصص دراستى بقى هو الدراما و النقد فى قسم علوم مسرح اللى هو فى كلية أداب فى الجامعة البعيدة دى اللى حواليها صحرا أسمها يا باشا جامعة حلوان. و طبعا لازم أحب المسرح لأنى أخترتة بمزاجى,بس يا باشا حال المسرح عندنا مايسرش وبحاول أدورلة على علاج.

شخصيتك نوعها اية؟
النوع بيقولوا عليه أنثى سعادتك!!
حاضر هتكلم أهة من غير لف ولا دوران..
"أنا لست مريضة,فقط تحدث لى أشياء بفعل الكلام,أشك و أوقن,و اتأرجح هكذا بين طيبة المعانى و خبثها.
يوخزنى سحر النبرات و لا أستطيع لها رداَ يتموج الكلام على الصفحات و يتخذ لنفسة معانى تتناقض مع نفسها بين لحظة و أخرى,تارة تبدو محملة,حبلى,تكاد تفيض بالخير العميم على كل البشر و فى اللحظة التى تليها ينفض السحر و يسود العقلاء الأشرار..."

لأ يا باشا ده مش كلامى ده كلام سمية رمضان بس أنا حسيت أنا اللى عايزة أقولة

السفر بالنسبة لك؟
دهشة..أنتعاش..ناس جديدة..دماغ مختلفة..تأمل..ثم فيض بأى شكل من الأشكال الفنى هيحصل.

المود بتاعك؟
فتحت شباكى لشمس الصباح, مادخلش منه غير عويل الريح و فتحت قلبى عشان أبوح بالألم ماخرجش منه غير محبة و سماح

وقت فراغك بتعمل فيه اية؟
بنفخ بلالين....وبحب أرسم عليها وبحب أقشر برتقال و أقعد ألعب بالقشر.. بس الكلام ده كلة فى حالات الفراغ المملة..
أما بقى لما بكون نشيطة كدة و فايقة مش فراغ أكتئاب,بحب أقرا طبعا ده شىء أساسى سواء فى فراغ أو غيرة, و برسم طبعا,بقعد أفن بقى أى حاجة ليها علاقة بالفن بحب أعملها..
أخرج و أتفرج ع الناس حواليا و أشترى كتب و أشرب عصير قصب..و أرجع أقعد أكتب..
أسأل عن حد مقصرة فى حقة و أقولة يسامحنى..
مش فاكرة بعمل إيه تانى بقى بس أنا مبحبش يكون عندى وقت فراغ!!

الاكلة المفضلة؟
مممم,سؤال صعب..بصراحة أنا مش أكيلة و مش متذوقة فبقضيها أى حاجة.بس طبعا ليا حاجات ممكن أحنلها زى البيتزا و شوربة الكريمة و البيكاتا..و بصراحة اللى بيخلينى أكتر أكل لما ببقى مع ناس بحبهم ممكن يشجعونى أكل وبالمناسبة دى أحب أشكر روبى باشا صديقى العزيز الى عرفنى على (دهب) وخلانى أحب من عندها العدس و الكفتة البانية اللى صمم يدوقهملى و بقيت بحنيلهم,بس اللى بحنلة أكتر القعدة نفسها هناك مع إنة مكان بسيط جدا.

الصفات اللي خدتها من بابا؟
خدت من بابا كذا حاجة,خدت منه هدوءة,طيبتة,فنة أبويا ده رجل فنان قوى بس هو اللى دافن مواهبة بس أنا ان شاء الله مش ناوية أدفن مواهبى زية..مش عارفة خدت منة إيه تانى!!
أه أفتكرت حاجة كمان,أعتقد إنى خدت منه الصبر.

الصفات اللي خدتها من ماما؟
أوبااااا..إيه السؤال المحرج ده..هو أنا أكيد خدت منها حاجات بس أول ما ألاقيها فيا بحاول أغيرها فبصراحة مش عارفة..أنا ماخدتش من أمى أى حاجة لا ملامح و لا صفات,و لما بلاقى حاجات بعامل الوراثة مأثرة فيا بطورها أو أغيرها خالص..

اكتر 6 حاجات بتكرهها؟
إنى أطبخ
إنى أتعامل مع حد منافق و جاهل
إن حد يعاكسنى فى الشارع
حد يجبرنى على حاجة بأسم مصلحتى
الأفراح الرسمية(مع ذكر الفرق بين الفرحة نفسها و الرسمية المستفذة فى أفراحنا)

الأبتزاز العاطفى بكل أشكالة

اكتر 6 حاجات بتحبها؟
الكتب
سحر الموجى
البالية المائى, المياة بالنسبة لى شىء سحرى
أودتى و كمان الطبيعة برة يعنى مش كائن متقوقع فى أودتى يعنى(أه لو أطول أزرع شجرة فى أودتى هبقى مش عايزة حاجة تانى من الدنيا غير شوية شمس و هوا نضيف)
أوراقى الخاصة اللى فيها كل البلاوى بتاعتى من و أنا عندى عشر سنين
الناس اللى بتحبنى بجد وهما عارفين نفسهم بقى..

الشغل بالنسبة لك؟
تحرر من السلطة الرأسماية فى البيت. معرفة,علاقة خاصة.
شغلى هيكون أنا من الأخر..

اية الكومبيوتر والانترنت بالنسبة لك؟
حياة بشكل مختلف,حلو عشان بيدخلنى عوالم كتيييييير و مقرف لأنى بكره التعامل مع التكنولوجيا

عايزيني امرر التاج دلوقتي لحد
لما ابعت تاج لحد أحب أنا اللى أعمل الأسئلة,بس إذا كان هيصيبنى الحظ السيء لمدة أسبوع (زى ما بيكتبة فى الإيميلات) فممكن أختار دودو(هدى) وبنت الحياة (فاطمة)

فى سؤال أتنسى يتكتب"هل لديك أقوال أخرى؟"

فى حرية أختيار فى أنكوا تبعتوا التاج ده لحد تانى أو لأ, بس أتمنى تردوا عليه