Tuesday, February 20, 2007

إشمعنى المعنى بيعرفنى لو باتت فى قلوبنا جراح؟



قررت أكتب..مش عارفة هقول إيه بالضبط بس عايزة أتكلم عن شعورى فى اللحظة دى..
مش عارفة أسميه إيه..لحظة صدق؟ تجاوز؟ إيمان؟ و الله ما عارفة بس زى ما أكون أتصفيت كدة مرة واحدة!!
بس فى سبب واضحلى تماما هو سبب من أسباب شعورى ده..حفلة وجيه عزيز و على سلامة.
بجد الحفلة دى عبارة عن حفلة تطهير,تطهير للنفس من كل التراكمات اللى كل يوم بنتنافس مين هيحّوش حشرات و تراب جواه أكتر من التانى..
كان نفسى أصرخ و بالفعل كعادتى فى الحفلات و كنوع من التشجيع بصّوت فعلا, بس مش ولولة يعنى صراخ من نوع غريب كدة!! ما علينا المهم إنى قدرت أعبر عن حاجة..
طبعا مش الحفلة لوحدها اللى أثرت فيا,أنا متعودة أروح أى حفلة لوحدى بس بجد وجود ناس معينة النهاردة معايا أثر فيا,(أولاد سحر) طبعا هما عارفين نفسهم,مروة,هدى,مى,أبو الوفا و طبعا البيج بوس بتاعنا و أمنا الروحية سحر الموجى..
ياسمينا بجد كنت مفتقداكى النهاردة بالذات قوى,كان نفسى أخدك فى حضنى قوى و أقولك إنى بحبك قوى,
فاطمة بالرغم إنى دايما أحس إننا بعاد عن بعض مش عارفة ليه, بس أنا فعلا بحبك و كان نفسى تكونى موجودة..
هدى بجد زعلانة إنك مسافرة لأن إنتى اللى جمعتينا كدة و عمرى ما هنسى ده بس مبسوطة لأنك فى طريقك لتحقيق حاجات طبعا هتساعدك بعدين كلها 3 شهور و ترجعيلنا إن شاء الله و ترفعى راسنا يارب, بحبك يا أحلى دوددا.
سحرورة,مفيش ولا كلمة أقدر أقولك بيها إنتى إيه بالنسبة لى..ربنا يخليكى لينا و النبى خلى بالك من صحتك شوية.أه نسيت أقولك أهم حاجة إنتى إزاى بتحسينى قوى كدة؟!!!! حضنك ده عمرى ما هنساه بس خايفة أدمنة..

عملت النهارده حاجات كتير مبسوطة منها و كنت مفتقداها قوى,أولا أعترفت بمشاعر جوايا كنت بحاول أكبتها كل فترة بس لقيت إن حقها يطلع اللى عجبنى بقى إنى مهبلتش زى ما دايما أهبّل و أقول لنفسى حجة إنى لازم أحترم مشاعرى أيا كانت,بس ساعات بيكون إحترامك لمشاعرك ده هو عدم تعبيرك عنها..(طبعا ماحدش فاهم حاجة) أصل أنا بس اللى عارفة كنت بفكر فى إيه lol.
المهم بدأت أستعيد نشاطاتى اللى كنت واخدة أجازة منها طول فترة الأجازة ماعرفش ده فادنى و لا كان غلط بس هو أكيد لما يزيد عن حدة هيبقى شعور غبى إنك بقيت و لا حاجة فى الدنيا و إنك عايش على هامش كل حاجة..
بدأت أرجع أقرا,و أبتديت أعمل حاجات صغيرة قوى بس كانت بتسعدنى جدا زى مثلا إنى أروح معرض فنى أكتشفت إنى بقالى كتير قوى ماتفرجتش على معارض أو مسرحيات أو أى إبداع فبالتالى كان لازم أفقد شعورى بالجمال و عدم القدرة على الإبداع(أينعم غرضى ماكنش شريف لما روحت الجاليرى بس أهة إسمى خدت خطوة) و كمان جبت كتب كالعادة.. و عملت حاجات إنسانية كنت مفتقداها قوى و اللى بالتالى كانت مأثرة على إنسانيتى و قدر همى بالناس لأنى كنت أنانية و مش شايفة غير مشاكلى..
المهم لما رجعت من الحفلة كلمت أستاذى أحمد عامر عشان عارفة إنة زعلان منى,أنا مش عارفة أتعامل معاه بس بحاول. كلمتة أقولة إنى أسفة لأنى بخذلة كتير بس مش عارفة ليه هو مش قادر يفهمنى لحد دلوقتى (لو هقدر أغير راح أغير لو مش قادر أنا لازم أغير و أتغير) د.أحمد أنا لسة عند وعدى ليك,مهما وقعت منك فى النص أنا عارفة إنى مش هستسلم,و ياريت تحاول يبقى عندك قدر من التسامح أكتر و بلاش أنت تخذلنى برضة,مش عارفة أشرحلك اللى فى دماغى و مش عارفة أتكلم معاك فيه دلوقتى و طبعا أنت كالعادة صدمتنى بقسوتك لما كلمتك عشان أقولك إنى فى موود حلو قوى و مش عايزة أى حد يبقى زعلان منى و حاولت أوصلك اللى أنت كنت بتعلمهولى أصلا و هو إن ماحدش باقى فى الدنيا دى و لازم نقول للى بنحبهم أد إيه إحنا بنحبهم قبل ما نخسرهم فى لحظة فجأة و هما مش عارفين حقيقة مشاعرنا..المهم كل اللى كنت عايزة أوصلهولك إنى قدرت أتجاوز الحاجات اللى مضايقانى منك أنا كمان و أقولك إنك برضة حد مهم فى حياتى,و إنى عند وعدى مش بخذلك زى ما أنت متصور,مش لازم أعمل اللى أنت عايزنى أعملة عشان أبقى عند حسن ظنك!! فى حاجات أنا بعملها بتسعدنى يمكن أكتر و بتخلينى أشتغل على نفسى أكتر من طلباتك,حتى لو إحنا لينا نفس الهدف فأنا دايما بحسّ إن طريقنا للوصول ليه مختلف فسيبنى أعيش طريقى بنفسى من غير ما تسيبنى لوحدى و من غير ما تحس إنى بتمرد عليك..
بعدين فى نقطة مهمة لازم تعرفها عنى و هى إنى لما أحس إن حد منتظر منى حاجة فأنا أغلب الوقت مابعملش الحاجة دى,ماعرفش ده صح و لا غلط,أو إن حد ياخد عنى إنطباع و مقتنع بيه جدا و هو مش حقيقى فلازم تعرف إنى مش بسعى لتغيير الإنطباع ده و إنى ممكن ألاقينى بعند و أقولك أهة بقى مش عاملة اللى أنت عايزة و خليك فاهمنى غلط!! طبعا ده هبل بس أنا بقولك حاجة لسة متغيرتش فيا و معرفش هتتغير و لا لأ
..


طبعا فى جزء مهم قوى لازم أعملة عشان يكمل شعورى بالرضا و طبعا هو رضا أهلى عليا..أو مهما حصل بينا نفسى يعرفوا أد إيه أنا بحبهم(أصل لما تبقى محبوب من الناس و بتعرف تسعدهم و مش بتعرف تسعد أهلك ده شعور قاتل!!) و بالتالى أخدت القرار ده النهاردة و أنا راجعة من الحفلة و هو إنى أشترى ورد لأبويا و أمى
هى بصراحة حاجة جت بالصدفة لأنى قابلت محل الورد فى طريقى للبيت من غير ما أكون مقررة إنى هشترى بس أنا بؤمن بالإشارات و إن ربنا هو اللى بيعمل الحاجات دى..
المهم قررت أجيب ورد بلدى أحمر دايما يلفتنى شكلة و ريحتة مع إنى مش بحب الورد الأحمر!!
بس بعد كدة حسيت إنى عايزة أجيب قرنفل أبيض و بالفعل طلبت من الرجل يغيرلى طلبى, و لقيت الرجل حتى إدانى وردة روز منه ليا!! فرحت طبعا و حسيت إن دى كمان sign لأنك لما بتبقى مبسوط ده بينعكس على وشك و بالتالى تعاملك مع الناس فحسيت الرجل حاسس بيا!!!!
روحّت و قررت أكتب ورقة أحطها فى أودتهم أقولهم فيها إنى بحبهم و أحطلهم الورد فيصحوا يشوفوها..

يا سبحان الله لسه من كام يوم كنت حسة إن كل حاجة متأمرة عليا ضدى,النهاردة حسة إن كل حاجة متفقة إنها تسعدنى..
يا الله أنا بجد بحبك قوى,و مؤمنة إن كل حاجة بتحصلى بتكون قاصدها و عارفة إنها لمصلحتى عشان كدة بطلب منك إنك تسامحنى لو أعترضت على حاجة حصلتلى أو شكيت فيك للحظة و دايما نورّلى نورا عشان تنّور حواليها.
يارب سألت نفسى النهاردة عن قدر جمالك,لما بتأمل كل حاجة حواليا و جوايا بقول يا الله ما كل هذا الجمال و ما هو شكل من قادر على صنع كل هذا الجمال..؟!
طبعا أنا بسأل كل الناس تسامحنى على أى حاجة عملتها أو أى تقصير و مسألتكش أنت!!
بس أنت عارف إنى بعمل كل ده عشانك و متأكدة إنك حاسس بيا و عارف إنى طول الوقت بفكر فيك.
يارب أحمينى و قوينى
.
بعد الطوفان الجو شبورة..ننده لبعض بهمسة مذعورة
بشويش نمد الإيدين,يالى أنت جمبى أنت فين؟
كان فيه طوفان و خلاص مبقاش طوفان
ألمسنى ونسنى,أنا حيران
(سؤال العنوان أغنية لمنير و الكلام اللى بالبرتقالى)

13 comments:

rony said...

جميل جدا أنك تصالحى نفسك والأجمل أنك تحسى بنتيجة الصلح دة وأنعكاسة على حالتك وأزاى هى أتغيرت 180 درجة بس المهم انك ما تنسيهاش تانى ولو زعلت منك لازم تصالحيها تانى مافيش اجمل من الرضا فى الدنيا ماهو بيبدأ برضا النفس وبيجيب رضا الرب وأكيد رضا الوالدين وممكن رضا الناس ولوانة مش مضمون المهم تعملى اللى يرضى ربنا والباقى يجى لوحدة أنا مبسوطة معاكى واتمنى لك السعادة دائما

white seagull said...

رونى الجميلة,
مبسوطة بجد بمشاركتك دى معايا
أكيد أنا طول الوقت فى سعى إنى أفضل مستقرة نفسيا و راضية عن نفسى بس الحالة دى مش دايمة المهم هو إن الفترات اللى بين الحالتين ماطولش.
بجد شكرا على سعادتك معايا و يارب إنتى كمان تكونى سعيدة و راضية عن نفسك

قوليلى إنتى ماعندكيش بلوج أدخل علية؟

rony said...

ميرسى قوى على لقب جميلة بس اموت واعرف مين اللى قالك انى جميلة هههههههههه بصى مع انى مش راضية عن نفسى وانا قاعدة فى البيت ماليش دور فعال فى المجتمع فقررت ان اقتحم عليكم عالم البلوج يمكن اكسر الدنيا فانتظرينى قريبا واكيد انت اول واحدة ابعت لها تشرفينى بدخولها عندى واتوقع انك بردة هتكونى اخر واحدة وربنا يستر0

white seagull said...

طاب يالا مستنياكى تقوليلى عملت بلوج و قررت أكسر الدنيا و تدعونى أول واحدة أعملك الأفتتاح :)

أما بقى عن إنك مش جميلة فدى حاجة إحساسى مش بيكدب عليا فيها..سيبيها على الله

صحيح إنتى وصلتى للبلوج عندى إزاى؟!!

أنـــا حـــــــــرة said...

ايه ده يا رونى
يعنى انا مليش مكان فى البلوج
ده احنا هنعمله سواء

أنـــا حـــــــــرة said...

نورا

حبيت اوى احساسك اللى فى البوست
خصوصا انى قدرت امر بيه اليومين اللى فاتو
كان نفسى اجى الحفلة بس فعلا جعت البيت يوميها مرهقه و كان باقى ع الحفله ااقل من ساعه
و طبعا وجيه الحالة بتاعته ما تتوصفش
بس انا عايزة اعرف عمو و طنط عملوا ايه لما شافوا الورد
و ايه الحاجه اللى عبرتى فيها عن مشاعرك مش بهبل :)
طبعا كلكم واحشنى و سحر كمان واحشانى جدا لو ما شوفتهاش اليومين دول هتخنق بقى
قولى يارب اعرف اجى بكرة

ربنا يخليكى دايما مشرقة و منورة
افتكرى بقى لحظات الخنقه بتاعتك و اضحكى
و قولى ايه ده ده طلع عادى

و الحياة حلوة و ربنا احلى

يارب دايما مبسوطة بقى

rony said...

نورا انا عرفتك ياستى من بلوج ياسمين وعجبنى تعليقك على بوست عندها فدخلت بلوجك وقرأت لك وعلقت على طول0قوللى بقة انا مافهمتش حكاية احساسك يعنى انتى حاسة انى جميلة ولا مش جميلة وانا اقول لك اذا كان صح ولا خطأ بس لو خطأهتروح فيها رقاب خلى بالك0

rony said...

ياسمين ياخبر ياسمسمة دة البلوج كلة تحت أمرك هو أنا بس لقيتك مشغولة ماحبيتش أشغلك أكتر فقلت أحاول أنا وربنا ييسر بس أكيد هأحتاجك أصل شكلى كدة لازم أضحى يا بالجنين يا بالأم

white seagull said...

ياسمينا,
لسة مش مسامحاكى قوى على عدم مجيك الحفلة بس ماتقلقيش هعديهالك يعنى

أما بقى عن عمو و طنط طبعا ماصدقوش نفسهم و قالولى ده من إمتى!! بس طبعا ده فرق فى علاقتنا.كان شعور لطيف الحمد لله
أما بقى الموضوع التانى فبلاش فضايح و خليه بينى و بينك لما أشوفك :)

ربنا يخليكى على طول معايا و منورانى

white seagull said...

شكرا يا رونى على إهتمامك و دخولك عندى
ربنا يخليلنا ياسمين :)

أنا قصدت إن واضح إن روحك حلوة قوى و أكيد ده بينعكس عليكى من برة,بس..

بنت الحياه said...

Noura 7bebty ..
A veryyyyyy beautiful post indeed..
I am sorry if i made u feel away, but i always think of you as near to me and i always appreciate your tender and talented gifted soul 7bebty..
I wish to be lucky enough tomoro isa..
Luv u ..

white seagull said...

thnx fatoom 4 ur lovely words..
eb2y zoreeny 3la tool b2a balash kasal..

will said...

情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品

麻將,台灣彩卷,六合彩開獎號碼,運動彩卷,六合彩,遊戲,線上遊戲,cs online,搓麻將,矽谷麻將,明星三缺一, 橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,電玩快打,麻將,台灣彩卷,六合彩開獎號碼,運動彩卷,六合彩,線上遊戲,矽谷麻將,明星3缺一,橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,遊戲區,電玩快打,cs online