سيد حجاب

باحلم إنى باحلم

باحلم إن الدنيا بتحلم

لما العالم يخنق أيام الإنسان الفانى

من أحلامة الحرة يخلق عالم تانى..

باكبر باكبر فوق أحزانى

باحلم إن الكون مابقاش مجنون

وصبح أحلى..وأحلم

ده كلام سيد حجاب..أنا بكتب الموضوع مخصوص عنة لأنة ذكرى أول مرة قابلتة فيها من سنة..كان يوم 25 ديسمبر2005

يمكن تلاحظوا إن التاريخ قريب قوى من وفاة جدتى, هو فعلا أنا قابلتوا بعديها بكام يوم

ده أكيد كان حاجة مأثرة عليا.. أولا أنا كنت هقابلة عشان كنت هعمل معاه حوار لجريدة الكرامة,كنت بكتب فيها وقتها

كنت واخدة الموضوع تحدى,عشان أنا بتكسف جدا بس كنت عايزة أعمل معاه حوار جدا وقولتلهم فى الجريدة إنى هعمل معاه حوار. و فعلا جبت نمرتة وكلمتة وأتفقت معاه على ميعاد وكان رجل دمة خفيف معايا جدا و شال منى شوية الرهبة اللى كانت عندى.

المهم جت وفاة جدتى وطبعا مش محتاجة أوصف حالتى ساعتها وماكنش ينفع ألغى ميعادى معاه لأنى مرتبطة بميعاد فى الجريدة, المهم جمعت نفسى وقررت أتغاضى عن حزنى لأن الحياة لازم تمشى وماحدش هيقدر حزنى.

و روحت فى الميعاد المحدد لسيد حجاب فى بيتة.

وكانت ليلة...عمرى ما هنسى اليوم ده. كان فريندلى جدا معايا وعملى شاى بنفسة وسمحلى اتفرج على مكتبتة, طبعا أنا كنت مرعوبة فى الأول ومش عارفة أبدأ الكلام وحسيت بالسذاجة قوى بس الحمد لله ربنا عدا اليوم على خير وأتكلمت معاه كتير فى مواضيع مختلفة وطبعا كنت بسجل.

يومها نزلت من عنده وأنا شايفة الحياة بشكل مختلف ولقيتة بدون وعى منة حول الحزن اللى جوايا كلة لطاقة إيجابية.

وأول ما نزلت من عندة كنت عايزة أقول للناس كلها أنا كنت مع سيد حجاب أنا كنت مع سيد حجاب,وحسيت إنى ماشية بضحك فى وش كل الناس.. و روحت كلمت أستاذى قولتلة "قابلت سيد حجاب ولسة نازلة من عندة" طبعا أنا بقولها وأنا الدنيا مش سيعانى. الموضوع ببساطة مش إنى قابلت شخص معروف بقى وبتاع, لأ خالص الموضوع كلة إنى شفت إنسان جميل بجد, بعيدا عن إنة شاعر. وبعد كدة بفترة كلمتة تانى عشان أقولة إن الموضوع نزل, وبعدها بفترة قابلتة بالصدفة فى الأوبرا وفوجئت إنه لسة فاكرنى.. وتوالت الصدف وكل مرة الدنيا كانت تبقى مش سيعانى.

أنا عارفة إن الموضوع شخصى ومايهمش حد إنى قابلت سيد حجاب بس ده كان يوم مهم قوى فى حياتى فحبيت أعملة ذكرى وأقول لسيد حجاب إنى بحبة جدا كشاعر وكإنسان وربنا يديلة طولة العمر.

كلمايتى...

غنمايتى..عصايتى..

آيتى.. رايتى..سرايتى..

قمرايتى..جمرايتى..مرايتى..تمرايتى..

منجايتى..كمنجايتى..رحايتى..

كلمايتى..بدايتى..دايتى..مشايتى..ربايتى

كلمايتى..غايتى..نهايتى..حفرايتى!