هو أنا شايفة الدنيا من برج عاجى؟

ومين يجز بإيدة الورد

يقص قصد جناح عصفور؟

ميين ميين مين يجز بإيدة الورد؟

ميين ميين يقص قصد جناح عصفور؟

ميين ميين مين يجرى دموع ع الخد؟

ميين ميين يطفى بقساوة شعاع نور؟

ميين ميين مين إيديه تفرح بالدم؟

ميين ميين بجرح عمرة ما يوم يتلم؟

ميين ميين................؟؟؟

(أغنية لمحمد منير من فيلم دنيا)

هو أنا اللى عايشة فى العالم المثالى بتاعى ومغمضة عينى عن الحقيقة و لا الحياة قاسية قوى كدة؟! أنا عارفة إن الحياة قاسية وفيها مشاكل بالهبل وأنا حياتى مش وردى بس أنا عايزة أخليها وردى بحاول أتعايش مع القساوة دى وأعرف أسبابها.. ساعات أقول لنفسى أنتى هبلة هو انتى يعنى اللى هتغيرى الدنيا, بس أرجع و أقول أهه يبقى أسمى حاولت بدل ما أبقى سلبية.. بعدين فكرة تانية غبية ترجع تقولى أنتى أصلك متألمتيش ومعندكيش كوارث هتحسى إزاى بألم الأخرين, فالاقينى برد على طول وأقول (لنفسى برضة) بأسلوب قبيح شوية, (مين ده ان شاء الله اللى متألمش..ا؟!!) وألاقينى أستغربت انى بستهون دايما بألامى وأكبّر من ألم الأخرين, المشكلة كلها إنى مابحبش أعيش دور الضحية ومش دايما ببين ألمى وأقول أنا أحسن من غيرى كتير يكفى ان عندى بيت برجع أنام فية ووقت ما أحب أكل بقدر أكل.

حتى لو الحياة كانت مرفهة معايا باجبر نفسى أحيانا أحس بألم الأخرين زى مثلا لما أقرر ماكولش حاجة و أشوف لما أجوع قوى إيه هيحصلى..أو ان يبقى عندى فرصة انى أركب تاكسى بس أختار أركب ميكروباص عشان أعرف الناس دى حياتها إزاى و إيه مشاكلها

أكيد بتخنق ساعات و أقرر أركب تاكسى بس صدقونى كل ما أقرر أركب تاكسى مش بلاقى حتى السواقين بقوا تنكين ع الأخر فأقرر انى أخدها مشى وأمرى لله وأقول أكيد هشوف حاجة جديدة لما أمشى فى الشارع فأصادف(بسام وحنان وأمانى وفاطمة وسمر) أطفال الشوارع وأصاحبهم و أتكلم معاهم,وأحس بفرحتهم لما أسمعهم أو أجيبلهم حاجة نفسهم فيها أو أعلمهم حاجة جديدة.. فأقول يا سبحان الله ربنا عمل كدة عشان أقابل الأطفال دول..

أفتكرت موقف دلوقتى ضايقنى قوى ويمكن يكون هو جزء من الأسباب اللى خليتنى قاعدة بكتب دلوقتى عشان أفكر هل فعلا انا عايشة فى عالم مثالى بتاعى ولسة ماشوفتش الدنيا على حقيقتها ولا إيه الحكاية؟

وهو إنى مرة كنت راكبة تاكسى والسواق كان قرفان من كل الدنيا, كنت فى الإسعاف وعايزة أروح الزمالك فأول ما ركبت راح قايلى هتلففينى بقى جوة الزمالك ولا فين؟ قولتلة لأ انت هتفضل على طول انا هنزل فى 26 يوليو, فقالى معلش أصلى رايح أبيع التاكسى أصلا ومش طايق أمشى فى الشوارع, المهم الكلام خدنا وعرفت من السواق انة كان رياضى وكان بيدّرب بألفين جنية المهم مش فاكرة إيه خلاة يسيب التدريب ويبقى سواق!! وأنا كنت طول الوقت بسمعة وأحاول أفهم هو ليه قرفان من البلد كدة. فهو لما لقانى بسمعة بهدوء وبتناقش معاه فى الحلول اللى بيقولهالى عشان مصر تخلص من الزحمة, الرجل أستغرب من هدوءى وحسسنى انى مش عايشة فى البلد!! قولتلة يا عم أنا أصلا فى جامعة حلوان وكل يوم ما بين حلوان والمهندسين وبشوف بلاوى إزاى بس مش عايشة فى البلد, انت اللى مش بتفكر غير فى مشكلتك لوحدك وان الناس التانية اللى قرفان منها دى عندها مشاكل بالهبل هى كمان( اللى مش بالضرورة أكون عارفاها بس ممكن أستشفها من الإسقاطات اللى بشوفها بتحصل من الناس على بعضها) الرجل نوعا ما اتخدّ وقالى انتى بتقولى كلام كبير قوى, قولتلة لأ والله مش كلام كبير إحنا بس محتاجين نستحمل بعض عشان كلنا فى نفس المشاكل, المهم الحمد لله أنا حسيت إن الرجل فكّ شوية وأبتدى يضحك والمية وحداشر أتفرضت وأخر جملة قالهالى يارب تفضلى متفاءلة كدة على طول, قولتلة و يارب أنت كمان تتقبل الحياة وتدور لنفسك على حلول

الموقف ده بالرغم أنه ضايقنى عشان كتير بيتاخد عنى أنطباع إنى مش عايشة فى البلد إلا أنى أتبسط عشان حسيت السواق على الأقل ضحك شوية (وارد جدا يكون كان بيضحك عليا ويقول إيه العبيطة دى) بس من أخر جملة قالهالى ماحستش إنه أستعبطنى وممكن فعلا يبتدى يفكر بشكل تانى.. الله أعلم

تفتكروا أنا ساذجة؟ أنا عارفة إن فى بلاوى فى البلد بس مشكلتى إنى مش عايزة أستسلم ليها,بحلم بدنيا تانية أه بس فى نفس الوقت عايشة فى الحياة بتاعتنا دى, نفسى أصلح من نفسى عشان أصلح حواليا كمان, وأدّور عن الأسباب اللى مخليا ناس ممكن تجّز بإيديها الورد وتقص قصد جناح عصفور وناس تفرح بالدم والجرح

نفسى أقدر أعمل حاجة بجد