cycle of pain..

life begins with a kiss..ends with a wonder.

Nora Fouad.

(all the pictures are for the greatest Alex Grey)

منهم فيهم

"عارفين ليه الحمّام هو أكتر مكان ممكن نعيط فيه؟"
طبعا أول حاجة هتيجى فى دماغكوا عشان بنبقى لوحدينا و ماحدش ممكن يدخل علينا.. بس حصلى مفاجأة لما سمعت إجابة تانية فى فيلم"منهم فيهم" للمخرجة ماجى مرجان, شخصية من الشخصيلت هى اللى سألت السؤال ده بعدين جاوبت علية..عشان الحمّام فيه مرايا و هى المرايا الوحيدة اللى هتشوف فيها نفسك ده نظرا لأن الحمّام هو المكان الآمن اللى هتعيط فية..أصل إحنا بنحب نشوف جرحنا!! فيصعب علينا نفسنا و نروح معيطين أكتر..
عُمر حد شاف نفسة و هو بيعيط؟ و يا ترى كان إيه شعورة لما شاف نفسة فى اللحظة دى؟ و إيه أكتر جرح ممكن يخليك تعيط؟ و إمتى مش بتقدر تشوف نفسك فى المرايا؟ و إيه الجرح اللى عمرك ما وريتة لحد؟؟

أسئلة كتير قوى جت فى دماغى و أنا بتفرج على الفيلم..بجد الفيلم ساب فيا أثر إنسانى عميق و نفسى أشوفة تانى,ياريت لو حد سمع إنه هيتعرض تانى فى أى مكان يشوفة و يقولى.. و ياريت كمان لو حد يعرف أنزل أغانى سعاد ماسى منين يقولى..

أحييكى ماجى مرجان و بجد فيلمك تحفة و مش مصدقة إن دى أول تجربة ليكى!! أختيارك للممثلين و الأغانى فى الفيلم و الحوار و تقسيمك للشخصيات, بجد الفيلم أثر فيا بشكل إيجابى جدا

(اللوحة للفنان ليام دالى)

دواير..دواير

كنت فاكرة كل حاجة بتحصل فى الأفلام بتحصل من الحقيقة(يعنى أكيد الكاتب ده شاف الكلام ده فجسدة) ده كان إعتقادى مافكرتش إن الكتابة ما هى إلا تعبير عن نواقصنا و نقط ضعفنا (ده بالنسبة لى يعنى)
كنت فاكرة الأحضان اللى فى الأفلام دى حقيقية, مش دى القضية دلوقتى أكيد فى أحضان حقيقية و صادقة فى الحقيقة بس اللى مضايقنى بقى إن فى الأفلام بتلاقى الحضن جاى فى وقتة تمام الأشخاص حسوا فى نفس اللحظة إنهم عايزين يحضنوا بعض و راحوا خدوا الفعل ده إنما فى الحقيقة بقى أه طبعا فى أحضان بس عمرها ما بتبقى محسوبة قوى كدة زى الأفلام,عمرها ما بتيجى فى وقتها,ليه دايما بنتردد؟ يا إما نتسرع و نحضن حد مايكونش جاهز للحظة الحضن دى يا إما نتأخر عليه و مانحضنوش فى اللحظة اللى هو محتاج فيها الأحتضان ده؟!!
يا ترى إيه السبب؟ ساعات بنبقى عارفين إن اللى قدامنا فى اللحظة دى محتاج قوى لحضننا بس نستهبل و نعمل نفسنا مش واخدين بالنا,ممكن يكون ناتج لأن أنت كمان مالقيتش اللى يحضنك فى اللحظة اللى أنت محتاجها قوى دى فتجاهلت الموقف زى ما غيرك بيتجاهلة معاك.. وهكذا..ما الدنيا إلا إسقاطات دائرية..
وطبعا بعد كل ده بينعدم الشعور الإنسانى و نصبح كتل حجرية متحركة لا تتأثر أو تؤثر حواليها...
بعترف إنى دخلت الدايرة دى..بخرج منها أحيانا لكن دايما أرجعلها..نفسى أعمل دايرة لوحدى مش ناقصة أدخل دواير غيرى ومش عايزة أدخّل حد دايرتى..

إشمعنى المعنى بيعرفنى لو باتت فى قلوبنا جراح؟

قررت أكتب..مش عارفة هقول إيه بالضبط بس عايزة أتكلم عن شعورى فى اللحظة دى..
مش عارفة أسميه إيه..لحظة صدق؟ تجاوز؟ إيمان؟ و الله ما عارفة بس زى ما أكون أتصفيت كدة مرة واحدة!!
بس فى سبب واضحلى تماما هو سبب من أسباب شعورى ده..حفلة وجيه عزيز و على سلامة.
بجد الحفلة دى عبارة عن حفلة تطهير,تطهير للنفس من كل التراكمات اللى كل يوم بنتنافس مين هيحّوش حشرات و تراب جواه أكتر من التانى..
كان نفسى أصرخ و بالفعل كعادتى فى الحفلات و كنوع من التشجيع بصّوت فعلا, بس مش ولولة يعنى صراخ من نوع غريب كدة!! ما علينا المهم إنى قدرت أعبر عن حاجة..
طبعا مش الحفلة لوحدها اللى أثرت فيا,أنا متعودة أروح أى حفلة لوحدى بس بجد وجود ناس معينة النهاردة معايا أثر فيا,(أولاد سحر) طبعا هما عارفين نفسهم,مروة,هدى,مى,أبو الوفا و طبعا البيج بوس بتاعنا و أمنا الروحية سحر الموجى..
ياسمينا بجد كنت مفتقداكى النهاردة بالذات قوى,كان نفسى أخدك فى حضنى قوى و أقولك إنى بحبك قوى,
فاطمة بالرغم إنى دايما أحس إننا بعاد عن بعض مش عارفة ليه, بس أنا فعلا بحبك و كان نفسى تكونى موجودة..
هدى بجد زعلانة إنك مسافرة لأن إنتى اللى جمعتينا كدة و عمرى ما هنسى ده بس مبسوطة لأنك فى طريقك لتحقيق حاجات طبعا هتساعدك بعدين كلها 3 شهور و ترجعيلنا إن شاء الله و ترفعى راسنا يارب, بحبك يا أحلى دوددا.
سحرورة,مفيش ولا كلمة أقدر أقولك بيها إنتى إيه بالنسبة لى..ربنا يخليكى لينا و النبى خلى بالك من صحتك شوية.أه نسيت أقولك أهم حاجة إنتى إزاى بتحسينى قوى كدة؟!!!! حضنك ده عمرى ما هنساه بس خايفة أدمنة..

عملت النهارده حاجات كتير مبسوطة منها و كنت مفتقداها قوى,أولا أعترفت بمشاعر جوايا كنت بحاول أكبتها كل فترة بس لقيت إن حقها يطلع اللى عجبنى بقى إنى مهبلتش زى ما دايما أهبّل و أقول لنفسى حجة إنى لازم أحترم مشاعرى أيا كانت,بس ساعات بيكون إحترامك لمشاعرك ده هو عدم تعبيرك عنها..(طبعا ماحدش فاهم حاجة) أصل أنا بس اللى عارفة كنت بفكر فى إيه lol.
المهم بدأت أستعيد نشاطاتى اللى كنت واخدة أجازة منها طول فترة الأجازة ماعرفش ده فادنى و لا كان غلط بس هو أكيد لما يزيد عن حدة هيبقى شعور غبى إنك بقيت و لا حاجة فى الدنيا و إنك عايش على هامش كل حاجة..
بدأت أرجع أقرا,و أبتديت أعمل حاجات صغيرة قوى بس كانت بتسعدنى جدا زى مثلا إنى أروح معرض فنى أكتشفت إنى بقالى كتير قوى ماتفرجتش على معارض أو مسرحيات أو أى إبداع فبالتالى كان لازم أفقد شعورى بالجمال و عدم القدرة على الإبداع(أينعم غرضى ماكنش شريف لما روحت الجاليرى بس أهة إسمى خدت خطوة) و كمان جبت كتب كالعادة.. و عملت حاجات إنسانية كنت مفتقداها قوى و اللى بالتالى كانت مأثرة على إنسانيتى و قدر همى بالناس لأنى كنت أنانية و مش شايفة غير مشاكلى..
المهم لما رجعت من الحفلة كلمت أستاذى أحمد عامر عشان عارفة إنة زعلان منى,أنا مش عارفة أتعامل معاه بس بحاول. كلمتة أقولة إنى أسفة لأنى بخذلة كتير بس مش عارفة ليه هو مش قادر يفهمنى لحد دلوقتى (لو هقدر أغير راح أغير لو مش قادر أنا لازم أغير و أتغير) د.أحمد أنا لسة عند وعدى ليك,مهما وقعت منك فى النص أنا عارفة إنى مش هستسلم,و ياريت تحاول يبقى عندك قدر من التسامح أكتر و بلاش أنت تخذلنى برضة,مش عارفة أشرحلك اللى فى دماغى و مش عارفة أتكلم معاك فيه دلوقتى و طبعا أنت كالعادة صدمتنى بقسوتك لما كلمتك عشان أقولك إنى فى موود حلو قوى و مش عايزة أى حد يبقى زعلان منى و حاولت أوصلك اللى أنت كنت بتعلمهولى أصلا و هو إن ماحدش باقى فى الدنيا دى و لازم نقول للى بنحبهم أد إيه إحنا بنحبهم قبل ما نخسرهم فى لحظة فجأة و هما مش عارفين حقيقة مشاعرنا..المهم كل اللى كنت عايزة أوصلهولك إنى قدرت أتجاوز الحاجات اللى مضايقانى منك أنا كمان و أقولك إنك برضة حد مهم فى حياتى,و إنى عند وعدى مش بخذلك زى ما أنت متصور,مش لازم أعمل اللى أنت عايزنى أعملة عشان أبقى عند حسن ظنك!! فى حاجات أنا بعملها بتسعدنى يمكن أكتر و بتخلينى أشتغل على نفسى أكتر من طلباتك,حتى لو إحنا لينا نفس الهدف فأنا دايما بحسّ إن طريقنا للوصول ليه مختلف فسيبنى أعيش طريقى بنفسى من غير ما تسيبنى لوحدى و من غير ما تحس إنى بتمرد عليك..
بعدين فى نقطة مهمة لازم تعرفها عنى و هى إنى لما أحس إن حد منتظر منى حاجة فأنا أغلب الوقت مابعملش الحاجة دى,ماعرفش ده صح و لا غلط,أو إن حد ياخد عنى إنطباع و مقتنع بيه جدا و هو مش حقيقى فلازم تعرف إنى مش بسعى لتغيير الإنطباع ده و إنى ممكن ألاقينى بعند و أقولك أهة بقى مش عاملة اللى أنت عايزة و خليك فاهمنى غلط!! طبعا ده هبل بس أنا بقولك حاجة لسة متغيرتش فيا و معرفش هتتغير و لا لأ..

طبعا فى جزء مهم قوى لازم أعملة عشان يكمل شعورى بالرضا و طبعا هو رضا أهلى عليا..أو مهما حصل بينا نفسى يعرفوا أد إيه أنا بحبهم(أصل لما تبقى محبوب من الناس و بتعرف تسعدهم و مش بتعرف تسعد أهلك ده شعور قاتل!!) و بالتالى أخدت القرار ده النهاردة و أنا راجعة من الحفلة و هو إنى أشترى ورد لأبويا و أمى
هى بصراحة حاجة جت بالصدفة لأنى قابلت محل الورد فى طريقى للبيت من غير ما أكون مقررة إنى هشترى بس أنا بؤمن بالإشارات و إن ربنا هو اللى بيعمل الحاجات دى..
المهم قررت أجيب ورد بلدى أحمر دايما يلفتنى شكلة و ريحتة مع إنى مش بحب الورد الأحمر!!
بس بعد كدة حسيت إنى عايزة أجيب قرنفل أبيض و بالفعل طلبت من الرجل يغيرلى طلبى, و لقيت الرجل حتى إدانى وردة روز منه ليا!! فرحت طبعا و حسيت إن دى كمان sign لأنك لما بتبقى مبسوط ده بينعكس على وشك و بالتالى تعاملك مع الناس فحسيت الرجل حاسس بيا!!!!
روحّت و قررت أكتب ورقة أحطها فى أودتهم أقولهم فيها إنى بحبهم و أحطلهم الورد فيصحوا يشوفوها..

يا سبحان الله لسه من كام يوم كنت حسة إن كل حاجة متأمرة عليا ضدى,النهاردة حسة إن كل حاجة متفقة إنها تسعدنى..
يا الله أنا بجد بحبك قوى,و مؤمنة إن كل حاجة بتحصلى بتكون قاصدها و عارفة إنها لمصلحتى عشان كدة بطلب منك إنك تسامحنى لو أعترضت على حاجة حصلتلى أو شكيت فيك للحظة و دايما نورّلى نورا عشان تنّور حواليها.
يارب سألت نفسى النهاردة عن قدر جمالك,لما بتأمل كل حاجة حواليا و جوايا بقول يا الله ما كل هذا الجمال و ما هو شكل من قادر على صنع كل هذا الجمال..؟!
طبعا أنا بسأل كل الناس تسامحنى على أى حاجة عملتها أو أى تقصير و مسألتكش أنت!!
بس أنت عارف إنى بعمل كل ده عشانك و متأكدة إنك حاسس بيا و عارف إنى طول الوقت بفكر فيك.
يارب أحمينى و قوينى.

بعد الطوفان الجو شبورة..ننده لبعض بهمسة مذعورة

بشويش نمد الإيدين,يالى أنت جمبى أنت فين؟

كان فيه طوفان و خلاص مبقاش طوفان

ألمسنى ونسنى,أنا حيران

(سؤال العنوان أغنية لمنير و الكلام اللى بالبرتقالى)

decision

it's my own work..don't steal.

نعم إنها أنا

"موتى يا أنا,كاذبة أنت,منافقة,متعاظمة,مغرورة,خائنة,مهملة,غبية,قبيحة,ساذجة,شريرة,مستهترة,لا تحسنين عملا,نرجسية,لا تحركك ألام الأخرين,لا تمدى يد العون,سفيهة,هازئة,لا رجا منك و لا غفران لك,وحدك السبب فى كل شرور العالم و بلاويه,وحدك مسئولة,و أيضا تخافين..جبانة لا تقوين"

(سمية رمضان..أوراق النرجس)

أستجواب رسمى

بناء على رغبة ياسمينتى الحرة فى تمرير الأسئلة دى ليا فأنا أهة جاوبت على الأستجواب كلة يا باشا,بس هتلاحظوا أختلاف فى الأسلوب عشان جاوبت على الأسئلة فى يومين فى موود مختلف فالجزء الأول تخيلتة أستجواب فى الشرطة و جاوبت بشكل مهيس أما الجزء التانى جد و عادى..

صحيح يا ياسمينا الأسئلة دى بقى إيه نتيجتها هتقوليلى أنا مريضة و لا سليمة لما تقريها؟!! :)

اية اللي حيحصل لايميلك لما تموت ؟
والله يا باشا أنا هسيبة للورثة هما يتصرفوا فيه زى ما هما عايزين..

اديت الباس وورد لحد قبل كده؟
أيوة إديتة سعادتك

لو اه كانت طبيعة علاقتك بيه اية؟
والله يا باشا الجهاز بتاعى كان عطلان فأديتة لمى بنت خالى عشان تعملى حاجة, أصل يا باشا مى دى مننا و علينا, و أنا موصياها لما أموت هى تتصرف فى الميل بقى.

اسمك؟
محسوبتك نورا فؤاد.

اسم الدلع المشهور في وسط اصحابك؟
يا باشا الأسماء كتير و خير ربنا كتير و الحمد لله رضا, سعادتك أكتر إسم أنا مشهورة بيه هو نوار بس مش بتلصق فى أحمد نوار و الله يا باشا, ده أنا طلعت لقيت عمتى بتقولى نوار فأنا بحبة و أنتشر و المشكلة إنى بحب الرسم برضة فأتلصقلى تهمة إنى مستعارة الأسم من أحمد نوار(أينعم بحب شغلة) بس أنا مبحبوش..
كمان خالتى بتقولى بنورة,و برضة بحب الأسم ده قوى أو يمكن بحبة عشان بحب خالتى قوى..
أبويا بقى حضرتك بيقولى نرنر أو نرنور, و أمى مالهاش فى الدلع و الكلام الفاضى ده,
أما صحابى بقى كل حد بيقولى الأسم اللى هو شايفة مثلا(نوزا,ننور,نووش,نرانيرو...)مش فاكرة إيه تانى دلوقتى
والناس بقى اللى مش صحابى قوى و يبقوا عايزين يدلعونى ممكن يقولولى نور, أنا بحب أسم نور برضة عشان كان عندى مدرس بيقولى نور و أنا كنت بحبة قوى(الله يمسيك بالخير بقى يا مستر حمدى)
و كفاية كدة بقى,أهم حاجة بقى إن أنا بقول لنفسى نووش و نورتى,ماعرفش لية بس بنتعش بالأسمين دول..

عمرك؟
أنا شاب لكن عمرى و لا ألف عام..
حاضر حاضر.. من غير لف و دوران أنا 21 سعادتك

برجك؟
برج الجدى حضرتك أجدع الأبراج

مجالك او مجال دراستك ؟
محسوبتك تعجبك قوى فى الرسم,بحب أرسم قوى يا باشا,كمان كنت بحلم أبقى كاتبة بس واضح إن لسة بدرى قوى ع الموضوع ده لو حصل, أما تخصص دراستى بقى هو الدراما و النقد فى قسم علوم مسرح اللى هو فى كلية أداب فى الجامعة البعيدة دى اللى حواليها صحرا أسمها يا باشا جامعة حلوان. و طبعا لازم أحب المسرح لأنى أخترتة بمزاجى,بس يا باشا حال المسرح عندنا مايسرش وبحاول أدورلة على علاج.

شخصيتك نوعها اية؟
النوع بيقولوا عليه أنثى سعادتك!!
حاضر هتكلم أهة من غير لف ولا دوران..
"أنا لست مريضة,فقط تحدث لى أشياء بفعل الكلام,أشك و أوقن,و اتأرجح هكذا بين طيبة المعانى و خبثها.
يوخزنى سحر النبرات و لا أستطيع لها رداَ يتموج الكلام على الصفحات و يتخذ لنفسة معانى تتناقض مع نفسها بين لحظة و أخرى,تارة تبدو محملة,حبلى,تكاد تفيض بالخير العميم على كل البشر و فى اللحظة التى تليها ينفض السحر و يسود العقلاء الأشرار..."

لأ يا باشا ده مش كلامى ده كلام سمية رمضان بس أنا حسيت أنا اللى عايزة أقولة

السفر بالنسبة لك؟
دهشة..أنتعاش..ناس جديدة..دماغ مختلفة..تأمل..ثم فيض بأى شكل من الأشكال الفنى هيحصل.

المود بتاعك؟
فتحت شباكى لشمس الصباح, مادخلش منه غير عويل الريح و فتحت قلبى عشان أبوح بالألم ماخرجش منه غير محبة و سماح

وقت فراغك بتعمل فيه اية؟
بنفخ بلالين....وبحب أرسم عليها وبحب أقشر برتقال و أقعد ألعب بالقشر.. بس الكلام ده كلة فى حالات الفراغ المملة..
أما بقى لما بكون نشيطة كدة و فايقة مش فراغ أكتئاب,بحب أقرا طبعا ده شىء أساسى سواء فى فراغ أو غيرة, و برسم طبعا,بقعد أفن بقى أى حاجة ليها علاقة بالفن بحب أعملها..
أخرج و أتفرج ع الناس حواليا و أشترى كتب و أشرب عصير قصب..و أرجع أقعد أكتب..
أسأل عن حد مقصرة فى حقة و أقولة يسامحنى..
مش فاكرة بعمل إيه تانى بقى بس أنا مبحبش يكون عندى وقت فراغ!!

الاكلة المفضلة؟
مممم,سؤال صعب..بصراحة أنا مش أكيلة و مش متذوقة فبقضيها أى حاجة.بس طبعا ليا حاجات ممكن أحنلها زى البيتزا و شوربة الكريمة و البيكاتا..و بصراحة اللى بيخلينى أكتر أكل لما ببقى مع ناس بحبهم ممكن يشجعونى أكل وبالمناسبة دى أحب أشكر روبى باشا صديقى العزيز الى عرفنى على (دهب) وخلانى أحب من عندها العدس و الكفتة البانية اللى صمم يدوقهملى و بقيت بحنيلهم,بس اللى بحنلة أكتر القعدة نفسها هناك مع إنة مكان بسيط جدا.

الصفات اللي خدتها من بابا؟
خدت من بابا كذا حاجة,خدت منه هدوءة,طيبتة,فنة أبويا ده رجل فنان قوى بس هو اللى دافن مواهبة بس أنا ان شاء الله مش ناوية أدفن مواهبى زية..مش عارفة خدت منة إيه تانى!!
أه أفتكرت حاجة كمان,أعتقد إنى خدت منه الصبر.

الصفات اللي خدتها من ماما؟
أوبااااا..إيه السؤال المحرج ده..هو أنا أكيد خدت منها حاجات بس أول ما ألاقيها فيا بحاول أغيرها فبصراحة مش عارفة..أنا ماخدتش من أمى أى حاجة لا ملامح و لا صفات,و لما بلاقى حاجات بعامل الوراثة مأثرة فيا بطورها أو أغيرها خالص..

اكتر 6 حاجات بتكرهها؟
إنى أطبخ
إنى أتعامل مع حد منافق و جاهل
إن حد يعاكسنى فى الشارع
حد يجبرنى على حاجة بأسم مصلحتى
الأفراح الرسمية(مع ذكر الفرق بين الفرحة نفسها و الرسمية المستفذة فى أفراحنا)

الأبتزاز العاطفى بكل أشكالة

اكتر 6 حاجات بتحبها؟
الكتب
سحر الموجى
البالية المائى, المياة بالنسبة لى شىء سحرى
أودتى و كمان الطبيعة برة يعنى مش كائن متقوقع فى أودتى يعنى(أه لو أطول أزرع شجرة فى أودتى هبقى مش عايزة حاجة تانى من الدنيا غير شوية شمس و هوا نضيف)
أوراقى الخاصة اللى فيها كل البلاوى بتاعتى من و أنا عندى عشر سنين
الناس اللى بتحبنى بجد وهما عارفين نفسهم بقى..

الشغل بالنسبة لك؟
تحرر من السلطة الرأسماية فى البيت. معرفة,علاقة خاصة.
شغلى هيكون أنا من الأخر..

اية الكومبيوتر والانترنت بالنسبة لك؟
حياة بشكل مختلف,حلو عشان بيدخلنى عوالم كتيييييير و مقرف لأنى بكره التعامل مع التكنولوجيا

عايزيني امرر التاج دلوقتي لحد
لما ابعت تاج لحد أحب أنا اللى أعمل الأسئلة,بس إذا كان هيصيبنى الحظ السيء لمدة أسبوع (زى ما بيكتبة فى الإيميلات) فممكن أختار دودو(هدى) وبنت الحياة (فاطمة)

فى سؤال أتنسى يتكتب"هل لديك أقوال أخرى؟"

فى حرية أختيار فى أنكوا تبعتوا التاج ده لحد تانى أو لأ, بس أتمنى تردوا عليه