N O S T A L G I A

حب مالينى

ساعات أتوه مرات,ألقى القمر هدا
يسقى النسيم شربات فى ليل طويل عدا

مالقيتش موضوع أنسب من ده عشان أرجع أكتب ع البلوج,أولا أول يوم فى 2008 و أول يوم و أنا 22 سنة..
ياسمينتى و قمرى, بحبك يا أحلى صاحبة فى الدنيا,عمرى ما تصورت عيد ميلاد أحسن من اللى عملتيهولى, بجد التورتة اللى عملتيهالى مخصوص ليها معنى كبير قوى عندى كان بودى ماقطعهاش و أفضل محتفظة بيها بس برضة كان لازم أختبر قدرتك المطبخية عشان أطمن عليكى :)
بلالينك مدفيانى و ألوانها ساحرانى و بخورك مالينى حتى و هو مش مولع..مفاجأتك اللانهائية و كلامك اللى بيغذينى طول الوقت و السحر اللى مؤمنين بيه و كل شوية يثبتلنا إننا صح..

الحب ده أحلاه
لو وقفت الساعات صوتى أكيد أعلى.

ياسمين بحبك بجد و كلمة شكرا مش كفايه خالص

هاهو العيد يأتينا من جديد

بدايات تنتهى,نهايات تبدأ

أشياء تذهب و أخرى تأتى

و نحن دوما معا

نحتفل.

أو نحتسى بعض الأوجاع

ها هو عام مضى

و مازال كل شىء يأخذنا

للأجمل.

إسمحيلى أستعير كلماتك ليا و أردهالك عارفة إنك مش بتحتفظى بكل الكلام اللى بتكتبيهولى و عارفة إنك أول ما هتقريه هتضحكى و تقولى إيه ده أنا اللى كاتبة ده!!

أيوه ده كلامك :)