مبدأيا للتنويه: اللى عندة بوادر خنقة و أعراض أكتئاب مايقراش البوست ده لأنه مليان طاقة سلبية ممكن تِعدى. و ماحدش يقولى هى الدنيا كدة يوم حلو و يوم مر عشان حافظة كل الكلام ده و عارفة إن الحالة هتاخد وقتها و تعدى زى أى حاجة و عذرا للغة القبيحة
"بلّف فى المدينة,أعيش بعيون حزينة و نفسى أكون جنينة و ضلى يكون ربيع
بلّف فى الشوارع بلاقى القلب ضايع و أنا بعشق الجميع"
أصحى الصبح على عياط مريم بنت أختى,أقول خير, و أقوم,أشوف مريم بتضحك أضحكلها و أبوسها و أقول خير..أنزل أروح الكلية أركب صندوق الكتاكيت عشان أروح الكلية نفضل واقفين على كوبرى المنيب أد كدة عشان خرا البَِرك و المستنقعات مِعدى,كل يوم و أنا مروحّة نقف ساعة عشان سعادة خرا البِرَك و المستنقعات يعدى, مصيبة إيه دى, هى البلد مش هتنضف بقى,جاتكم القرف ريحتكم قرفتنا
أحلامنا ليه سلطة و كلامنا ليه سلطة؟!!
و أنا مروحّة بقى ركبت المترو صندوق أكبر شوية أصل الكتاكيت باضت عقبال عندكم.
فجأة تهجم شلة بنات(مع الأعتذار لكل بنت يعنى) لابسين لبس موحد كدة كحلى و هاتك يا رغى من أول ما ركبوا قلبوا المترو كله, و لما واحدة منهم قالتلهم يا جماعة عيب كدة أسكتوا شوية راحوا ماسكنها تريقة تمام, المهم من كلامهم عرفت إنهم مدرسة تمريض أو حاجة ليها علاقة يعنى بالتمريض
قلت الحمد لله لأ البلد فى تقدم مزدهر و الأجيال الجديدة ليها مستقبل بارز, ياعينى علينا لو حد وقع فى إيد ممرضة من دول
"ماعرفتش أحضنك..يمكن عشان طعم الكلام, يمكن عشان كتر الزحام,مخنوق مخنوق"
ياسمينتى أعتذار خاص
شكر خاص لوجيه عزيز,كل حفلة وأنت طيب
